Schwäbische Essenskultur

Saure Kuttla ond en Backstoikäs
isch's Festmenue von Maiers Res'.
Vielleicht manchmol so zwischanei
kennet's au no g'schupfte Nudla sei.
Ond will zur Brotzeit sie was naga
a schwaza Wuscht und Schwatamaga.
Ond hinterher springt sie wie a Wies'l
ond holet a Gläsle vom Bodensee-Dies'l.

Doch dia guate Schwäb'sche Essenskultur
schrneckt meistens doch de Alte nur.
D' Jugend hot halt andre G'schmäcker,
holt's Essa oft vom Pizza-Bäcker.
Koi Schweiners mit viel Sauerkraut,
und koine Knödel die's schlecht verdaut.
Schnell muaß gau und amerikanisch sei
sonst wär's halt nix und derf net sei.

In dr Kindheit goht des moischt' scho los
se wend koi Floisch blos Nudla mit Soss.
Vielleicht no Pommes mit viel Kätschup
a Mayonaisse lauft oft au an dr Lätsch nab.
Und hoat amol Hunger dann dia Schnut
dr Mac Donalds bietet immer no Fastfoot.
Oft kanost au wähla ob Pasta oder Pizza,
i sag do dann moistens basta und nix da.

Beim Essa bin i halt gera stur
halt mi an unser schwäbische Essenskultur.
I freu mi wenn i auf dr Speiskat' les
s'gibt saure Kuttla ond en Backstoikäs.
Und dann am End vom Schwäb' sche G'fräß
mach i dann mein Dank an Maiers Res.
Doch beim essa soll's au g'müatlich sei
drum drenk i dazua a Bier oder a Viertele Wei.

© by Johannes Wiest, Memmingen