Wer Zeitung liest der woiß Bescheid

Wer Zeitung liest der woiß Bescheid.
Wer Fernseh' guckt und Radio hört
dem graust's garoft vor manche Leit.
Bloß Mord und Todschlag, Haß und Neid,
koi Spur von Liab' und Gerechtigkeit.
So goht's it lang weiter liabe Leit.
Beim Volk hör' i drum leise schon
mir brauchet wieder a Revolution.
Wia so ebbes endet, ka ma immer ahna,
drum will i Euch davor au blos mahna.

Als Kind wirscht neig' setzt in dia Welt
es frogt di koiner ob dir des g'fällt.
Die Zeit isch sche, ma isch no jung,
und als Kind hosch koi Verantwortung.
Doch kaum wirscht größer, goht' s scho los,
in d' Schul muaßt goau, des sei famos.
Weil do viel lerne kasch für's Leba,
des goht zwar manchmol arg daneba.
Doch mit Geduld wirsch langsam g'scheit
lernsch en Beruf und hoscht a Freid.

Bisher hosch g'schätzt de große Leit,
hosch denkt die wisset guat Bescheid.
Und all's was kam von der Obrigkeit
des hosch du g'macht ganz ohne Neid.
Hosch G'setzer allweil voll eig'halta,
hosch denkt die brauchts halt zum verwalta,
daß d' Menschheit, Kinder, Frau und Ma
in Ruah und Frieda leba ka.
Hoscht Steira zahlt und warscht zufrieda
wärscht froh g'we, wenns au wär so blieba.

Doch mit der Zeit und immer wieder
do kriagst en Zorn mei liaber Fried'r,
weil allweil wieder hörscht und siehscht,
daß d' Welt a bissle anderscht ischt.
Do wird oft b'schissa und betroga,
wird manchmol g'stohla und au g'loga.
Manch oiner plant sogar en Mord,
mir tät's scho grausa bei dem Wort.
Von Kriag und Hass will i ganz schweiga,
a manches Volk muaß drunter leida.

Und au die G'setz dia se jetzt erlassa
ka's Volk oft überhaupt it fassa.
Do wird verordnet und reguliert,
studiert muaß sei, wer des kapiert.
Bald kasch de nomma frei bewega,
wenn dr Staat it gibt sein Allmachts-Sega.
Daß bald au s' schaffa macht koin Spaß
isch's Finanzamt schuld, do schiabsch en Haß.
Und oft no von deine allerletze Groscha
zahlscht en Strofzettel de Polizei-Hoschtessa.

Und wenn dann dein Fruscht willscht mal erseifa,
em Biergarta draußa, unter dene schöne Eicha,
dann wird dir klar, daß au do bald nix mehr goht,
weil so a nuia Verordnung dem dagega stoht.
Prozessiert häbed oine ,und se bliebet au stur,
gega dia Königlich-Bayrische Biergarta-Kultur.
Weil dr Lärm sie schreckt und Nachtruhe stört,
se kenntet doch auswandra, des wär au it verkehrt.
Setige Leit sot ma eifach nehma am Kraga
und sot se hochkant eifach zum Deifl jaga.

Manche stört, wenn in dr Kircha a Glocka leit'
und au wenn in dr Früeh dr Gockeler schreit.
Wenn beim Bauer im Stall dr Mist amol stinkt
und sicher bald au, wenn a Lieadle du singst.
Wenn telefonirscht, hoscht au a schlechts G'fühl
du woisch jo nia wer do eventuell mithöra will.
Weil i aber do gera wohna bleiba möcht,
sot ma abschaffa, all die saudomme Kneacht,
dia uns blos unser' Freid am Leba vermiesa,
des letzscht wo mer hand, bevor mr Auga schließa.

© by Johannes Wiest, Memmingen